MAMA... KUSAMBUT SALAM MU MALAM TADI...

7 Rejab 1433H

Buat yang dirindui

Mama Kami Tersayang

Pusara Kasih Berbunga Rindu

Mama…

ﺍﻠﺳﻼﻡ ﻋﻟﻴﻜﻢ ﻮﺮﺤﻤﺔ ﺍﻠﻠﮫ ﻮﺒﺮﻜﺎ ﺗﻪ

Bersama hembusan malam, kukirim salam sayang untuk Mama, beserta kalungan doa yang sentiasa menjadi rezeki untuk Mama di seberang sana. Biarlah Mama sentiasa mengecapi ketenangan dan kerahmatan dari Allah s.w.t di atas segala amal jariah Mama di dunia sini dahulu.

Mama…

Dimalam, 6 Rejab 1433H, ibarat aku mendapat sebuah perkhabaran dari kedikita apabila ‘aku bejumpa dengan kedikita’ di dalam tidurku. Biar alum dapat membendung kerinduanku arah kedikita, tapi sekadar menantang kedikita sesaat pun sudah syukur. kuterima Mama seadanya.

Mama…

Perjumpaan ketani malam atu, akan ku cuba kupas tiap saat pertemuan ketani atu untuk kutafsir maknannya. Mudah-mudahan ku mampu.

Kita tau Ma…

Malam atu, aku pun ‘bejumpa’ dengan Nini Hjh Intan. Ia menantang aku dengan tenang saja. Alhamdulillah…  Mudah-mudahan biskita di seberang sana sentiasa mendapat Rahmat dan Hidayah dari Allah jua. Amin…

Mama…

Petang tadi kami adi-beradi bekumpul di rumah Si Busu. Sekadar untuk memikirkan keadaan keluarga ketani Ma… . Cuma Si Awang ganya inda ada. Mungkin kalau kita ada, pasti kita akan sanang hati melihat kami sepakat memikirkan perihal keluarga ketani.

Tapi Ma…

Dalam kami bebincang atu, terasaku macam terasing Ma… inda ku tahu mengapa. Masa bebincang atu pun aku kan menangis rasanya. Aku inda dapat focus dalam berbincang atu. Kita tau Ma… hatiku masa atu mencari kedikita, memanggil kedikita. Rasanya, inda ku kan sanggup menanggung semua ani. Baru jua di malam aku mimpikan kedikita. Tapi demi Bapa, akan kugagahi jua hati ani untuk terus bersamanya.

Masa hari Rabu lapas, ada Bapa menalipon kediaku Ma…, ampus ia nya.  Aku masa atu training di Airport Mall. Ia tah ku turun ke kampong lapas training atu. Kesian ku jua kan Bapa atu Ma... Ia memberitahu ampus saja ia nya. Mungkin mun kedikita ada, dapat jua mengurut dadanya macam dulu. Malam atu ia kan tidur di rumah Si Alai. Sama-sama tah kami menyubarang ke darat.

Mama…

Sampai ani saja dulu ku becerita sama kedikita. Biarpun sudah 5 bulan labih Mama meninggalkan kami, aku mungkin sudah nampak macam dapat menjalani hidup ani dengan tenang, tapi yang pasti, hatiku masih meratpai pemergian kedikita.

Mama…

Berehat lah Mama dengan tenang. Biarlah malam ani ku alunkan dengan kalimah Al-Fatihah untuk mengulit diri Mama di seberang sana. Mudah-mudahan dapat menerangi halaman Mama. Amin…

ﻮﺍﻟﺳﻼﻢ

Dari anakmu yang kehilangan